Im Glaibasel, gnau in der reformierte St. Theodors-Gmaind, hets e Juugedgrubbe gää,  

d „Rhena-Juventus“ vom Basler Zwinglibund. Jeedes Joor isch me zämmen an d Faasnacht. Wo denn e Mitgliid im 1972 bi de „Holzwurmbrätscher“ mitgmacht het, isch me der ganz Oobe däre Gugge noochegloffe. „Was die kenne, bringe mir au feertig“, hets denn glyy ghaissen und noo der Faasnacht 1974 het me der eerscht Versuech gstaartet. Aaber wies esoo isch, die aafängligi Fraid isch bi ainige glyy verbyy gsii, wo si gheert hänn, was doo alles derhinder stoot: e Stammbaiz und Iebigslokaal sueche, Inschtrumänt kaufen und broobe, broobe, broobe!

Zuedäm het der Voorstand vo der „Rhena-Juventus“ Angscht ghaa, d Juugedgrubbe kennt drunter lyyde, die schlächt bsuechte Verainseebe wuurde denn numme no zem broobe „missbruucht“ und daas syyg jo nit der Zwägg vo däm Verain. Aaber der Trend vo de „Sibzigerjoor“ het au voor der „Rhena“ nit Halt gmacht. Der Noochwuggs vo Neikonfirmierten isch uusbliiben und so hänn die „Guggenaagfrässene“ wiider Ooberwasser griegt. Dass aaber nit wiider s glyyche wie im Joor voorhäär basiert, hänn si sich scho frie Lyt usserhalb vo der Juugedgrubbe gsuecht und esoo isch es am 6. Meerze 1975 im Reschtorant „Commerce“ am Riechering zer Grindigsversammlig koo. S isch e hitzigi Aagläägehait woorde! Unter Brodäscht het der Voorstand vo der „Rhena“ der Saal verloo. Zää Lyt sinn bliibe, fimf eemooligi Zwinglibindler und fimf „Fremdi“: e „Schrumpf-Huffe“! Kai Wunder het der Namme „Schrumpfkepf“ bi der Waal vom Namme fir der nei Verain s Renne gmacht.

S eerscht Joor isch haart woorde. Mit Uusnaam vo unserem Maioor (em Ex-Holzwuurm) sinn alles bluetigi Aafänger gsii. Aaber wo s eerscht Stiggli (s „Alouette“) äntlig gsässen isch, hänn mir is gfrait wie glaini Kinder. Au d Laarve sinn sälber gmacht woorde, ganzi 45 Stitzli het si koschtet. S Goschdyym isch e Nachthemmliglunggi gsii. Daas isch me derfiir groossaartig go kaufe: im Broggehuus fir zwai Frangge.....!

Die eerscht Faasnacht mit 13 Aggtyven isch fir alli en Erläbnis woorde. Sicher het mitgspiilt, dass es die eerscht iberhaupt gsii isch, aaber me het ooni Verpflichtige kenne mache, waas me het welle. No däre Faasnacht simmer als 42. Gugge zem Fasnachts-Comité koo, nodäm alli gsait hänn: mir mache wyter.........und jetzt sinns scho glyy 50 Joor!!

Zem 10-jeerige hets der eerscht „Schrumpfkopf“ als Stamm gää, zem 25-jeerige e neie (e baar hänn em alte no lang noochedruurt! Sisch wahrschienligg eweeneli zu „Affig“ gsi.) Und dorum sinn mr zumindescht Larvetechnisch im 2010 wieder ebitzeli zrugg zu de Wurzle. Zum 40-jeerige hetts denn zur Schrumpfkopf-Laarve e neys, fryndliggs Goschdyym gäh. Fimf Joor speeter sinn au d Hoor wieder wie anno 1985 apasst worde. Und syt em 2020 presentiere mir is im aggtuelle Stammgoschdyym.

D Mitgliiderzaal ligt sit e baar Joor bi eppe 20-25, 1995 bim 20-jeerige sinn mir 43 Naase gsii. Im 2007 hänn mir uns fir ai Faasnacht mit de „Gugge-Zwärgli“ zämmedoo und sinn mit 32 Aggtyyve gloffe. Syt 2008 isch au e Voordraab derbyy und au unser Requisitewäägeli mit Verpflägig mechte mir nimme misse. D Voorfaasnacht verbringe mir nid immer an de glyyche Ort. Meh findet uns in dr Region und amigs au ebitzeli wytters wäg wie zum Biespiel in Morcote im Tessin.

Nääbe vyylen Uffdritt an verschiidenschten Aaläss – au an Hochzyten under Aggtyyve - isch sicher d Dailnaam am „Mimösli“ im Joor 2000 und der Uffdritt am 80. Gebuurtsdaag vom Schorsch (dää vom Haafebeggi zwai!) im 2013 z erwääne.

Au Raise sinn in däne Joor gmacht woorde: Schyy-Wuchenänd in St. Stephan und Marbach (1988-91), Europapark Rust (1989), Paris („Attractions de Cirque et Fanfares“, 1994), Schottland (Jubileeumsrais, 2000) und Fraue-Wienachtsmäärtraise (2008-10).

Zur Fraid vom Seggelmaischter ooder-maischtere het men au no Gäld in d Kasse brocht und an Feschter mitgmacht: Schotte-Fescht (1987, Baiz), Dorffest Arlesheim (1988, Baiz), Güete-Bonjour-Fescht (1989, Stand), 600 Joor Glai- und Groossbasel zämme (1992, Stand), (Wettstai)Bruggefescht (1995, Stand), Landauerfescht (2008, Baiz), Riehen Fest (2009, 2013, 2017 und im 2022, Baiz).

Als Stamm- und Broobelokaal hänn mir ghaa: Reschtorant „Opéra“ (1976-80), „Alte Bayrische Bierhalle“ (1980-82), Hotel „Euler“ (1982-86), Reschtorant „Markthalle“ (1986-89), Reschtorant „Gundeldingerhof“ (1989-91), Reschtorant „L'Escale“ (1991-2011), „Orginal Chnulleri“-Käller (2011-12), Reschtorant „Gempenblick“, Rynach (2012-14), „Haanedropfer“-Käller (2014-2015), Senss AG in Rynach (2015-2017), „Gugge-Mysli“-Käller (2017-2018). Syt em Herbscht 2018 sinn mir im Reschtorant „Holzschopf“ am Clarablatz dehaim und broobe dien mir im Clara Schuelhuus.

Maie 2022

P.S. Leider isch unser Grindigsmitgliid und langjährige Bresidänt – dr Markus Sollberger -am 02. Juni 2021 verstoorbe. Er hett unseri Baseldytsche-Text mit viel Hiegoob und Knowhow gschriebe. Leider kenne mir das nid in sim Sinn wyters fiehre, well mir s Wisse nid hänn und doorum isch dä Text leider nur no e Halbweisheit vom Original Baseldytsch. Meh mags uns vergää aber mir möchte nid aifach alles lesche zum im Markus e Aadängge z bhalte.